السلام عليكم ورحمة الله وبركاته ...
إزيكوا النهاردة ؟؟ معلش بتأخر كتير عليكم :) ، كان في كلام كتير عايز أكتب عنّه بس في بصراحة موضوع نسّاني كل اللي عايز أكتب فيه، وهو موضوع " خده على قد عقله " ، "خده على قد عقله" الجملة دي معروفة لما بيبقى واحد بيقول كلام فاضي وانت مش عايز تخش معاه في جدال فبتقول لنفسك "خده على قد عقله"، لكن الغريب إن الجملة دي بقت هواية عند البعض :
- ولد بيغلط في أخوه الكبير، وبيعامله كإنه شغّال عنده، وأخوه الكبير بيتصرف "ككبير" وبيقوله احترم نفسك ما فيش فايدة، يقوم مكلّم أبوه (لإن المفروض هوا اللي ربّاه)، يقوم الأب يرد عليك بكل برود " انت المفروض تكون قدوة، انت المفروض انك تحتويه (أحطّه في قزازة يعني ) ، وبعدين مش كل هايفة تتصل بي "، طيب الأخ الأكبر مالقاش فايدة استعمل الأسلوب القديم اللي بيفهّم أي واحد ما عندوش دم الضرب، ورقعه العلقة التّمام، الأب " بتمد إيدك على أخوك ليه ؟؟ هوا انت اللي هتربيه ؟؟" الأخ الأكبر " بس ده غلط في وشتمني وكذا وكذا" الأب " طب ما تقولي إنه قل أدبه عليك " الأخ الأكبر " لا تعليق" ، خده على قد عقله .
- البنت خارجة من البيت وحاطة نص كيلو جبس على وشّها (تبييض)، ومش عارف إيه على عينيها، وخارجه ولا كإنها بلياتشو في سيرك، تقولها ده غلط وكذا وكذا، الرد الاعتيادي " وانت مالك إذا كان بابا مش معترض"، تروح لــ "بابا" "بنتك بتخرج حاطة كذا وكذا على وشها، وكل ما أكلمها تقولي بابا راضي" الأب " سيبها هي تقتنع (مش عارف اقتناع إيه اللي من غير كلام ده)، الأخ الأكبر " طيب ما تكلموها أو على الأقل بطّلوا تشترولها الماكياج والكلام الفاضي ده" الأب بحدة " وانت مال أهلك يا ابن ستين ... "، الأخ الأكبر " لا تعليق" ،خده على قد عقله .
- الأخ الأكبر "طبعاً هوا مش كامل" الأب عرف إنه عمل غلط معيّن، فجاء متهللة أساريره وقلبه يرفرف من الفرحة، " وعامل فيها شيخ البيت ؟؟ وانت فيك وفيك وفيك" الأخ الأكبر باستغراب على طريقة " عايز حاجة يا كابتن" ، " انت شفتني بعمل اللي انت بتقوله ؟؟" الأب "لأ"، الأخ الأكبر " طيب اللي نقلّك الكلام شافني" الأب "لأ"، الأخ الأكبر يعني لا شفتني ولا غيرك شافني أمال جاي تحاسبني على أي أساس ؟؟ وبعدين البيت كلّه واقع وجاي تحاسبني أنا في حاجة مش متأكد منها كمان ؟؟ " ، الأب بحماس " أيوة مش انت عامللي فيها شيخ، وانت المفروض قدوة ، وعامل وعامل وعامل... " الأخ الأكبر "أولاً أنا مش عاملّك ولا عامل لحد، ثانياً، إذا كان الكلام صحيح زي ما بتقول انت فمعتقدش اني بتفاخر بذنوبي وبجاهر بيها زي ناس، ثالثاً أنا لو قدوة زي ما بتقول كنت لقيت اللي بيقتدي بي، إنما مش قلة أدب وقلة قيمة والآخر تقولي قدوة" الأب " بس انت مختلف عنّهم المفروض انت ..... (كلام كتير مالوش لازمة تسمعوه) " الأخ الاكبر كالعادة "خده على قد عقله .
ودمتم ...
